ကုသိုလ်ကောင်းမှု၌ သာဓုခေါ်ခြင်းသည် ကုသိုလ်တခုဖြစ်ပေ၏။

သာဓု... သာဓု... သာဓု...။

ဆရာတော်ဘုရား ဦးလောကနာထ ဆိုဒ်မှ http://lknt.org

ဗုဒ္ဓတရား(ဗုဒ္ဓဘာသာ) နှင့် အဝိဇ္ဇာ-တဏှာတရား(အဝိဇ္ဇာ-တဏှာဘာသာ)
=========================
ဗုဒ္ဓတရားနှင့် အဝိဇ္ဇာ-တဏှာတရား ဆိုပြီး နှစ်မျိုးရှိပါတယ်။
ဘယ်တရားကို ရွေးချယ်လက်ခံမလဲ။

ဗုဒ္ဓတရားရဲ့ အရိပ်က အဇာတိဟုဆိုအပ်သော နိဗ္ဗာန်။
အဝိဇ္ဇာ-တဏှာတရား ရဲ့အရိပ်ကတော့ ဇာတိပေါ်၊ ခန္ဓာ့ဝန်ထမ်း၊ သေ ဆိုတဲ့သုံးမျိုး။

ဗုဒ္ဓတရားက-
အကုသိုလ်၊ ဒါန၊သီလ၊သမထ၊ဝိပဿနာ ဆိုတဲ့ ငါးမျိုးသောတရားကို ဝေဖန်ပိုင်းခြားပြီး အဝိဇ္ဇာ-တဏှာကင်းအောင် ဟောပါတယ်။

အဝိဇ္ဇာ-တဏှာတရား -
အကုသိုလ်လဲပါတယ်၊
ဒါနလည်းပြုခိုင်းတယ်၊ ပြီးတော့ ဇာတိပေါ်မယ့်လမ်းကိုလည်း ညွှန်ကြားတယ်။
သီလ လည်းဆောက်တည်ခိုင်းတယ် ပြီးတော့ ဇာတိပေါ်မယ့်လမ်းကိုလည်း ညွှန်ကြားတယ်။
သမထ လည်းလုပ်ခိုင်းတယ် ပြီးတော့ ဇာတိပေါ်မယ့်လမ်းကိုလည်း ညွှန်ကြားတယ်။
ဗုဒ္ဓတရားကို နာနေရင်းမှာ အဝိဇ္ဇာ-တဏှာတရားက ဝင်ဝင်လာပြီး ဟောလေ့ရှိတယ်။
(တရားနာတာ အချည်းအနှီးတော့ မဖြစ်ဘူး၊ နိဗ္ဗာန် မရောက်လဲ၊ နတ်ပြည်လောက်တော့ ရောက်မှာပေါ့ - ဒီလိုဟောတာ)။
(ကိုယ့်စိတ်ကို ဖြူဖြူစင်စင်ထား၊ သူတစ်ပါးကိုလည်း မပြစ်မှားနဲ့ သီလလည်း စောင့်၊ ဒါမှ လူတွေ၊ နတ်တွေက ချစ်ခင်ကြမယ်၊ လေးစားကြမယ်၊ သေရင် နတ်ပြည်ရောက်မယ် - ဒီလိုဟောတာ)။
(အကောင်းစကားနှင့်စပြီး ဇာတိကို တွန်းတွန်းပို့တတ်တယ်)။

ဗုဒ္ဓတရားက -
လာရာအရပ်က အဝိဇ္ဇာ-တဏှာ ပို့ဆောင်လိုက်လို့ အခု ဇာတိ ဒုက္ခ ချောက်ကြီးကိုကျတယ်၊ အဲဒီချောက်ကြီးမှာ ခန္ဓာ့ဝန်ဒုက္ခကို ထမ်းပိုးထားရပြီး အဲဒီချောက်ကြီးမှာပဲသေရမယ်။ နောက်ထပ် အဝိဇ္ဇာ-တဏှာ စခန်းထပ်ဖွင့်ရင် ဇာတိ ဒုက္ခ ချောက်ကြီးကိုထပ်ကျမယ်၊ အဲဒီချောက်ကြီးမှာ ခန္ဓာ့ဝန်ဒုက္ခကို ထပ်ထမ်းပိုးထားရမယ်၊ အဲဒီချောက်ကြီးမှာပဲ ထပ်သေရမယ်။ ဒီလိုနဲ့ပဲ လည်ပတ်နေလိမ့်မယ်။
ဒီလည်နေတဲ့ သံသရာချောက်ထဲက လွတ်ဆောင်မယ့်တရားကို ငါဘုရားဉာဏ်ဖြင့် သိမြင်ခဲ့လေပြီ။ ဒီတရားက မဂ္ဂင်ရှစ်ပါး အကျင့်တရားပဲ။ ဒါကို အတိုပြောရရင် မိမိခန္ဓာ့စဉ်မှာ ဖြစ်နေတဲ့ အနိစ္စသဘော၊ ဒုက္ခသဘော၊ အနတ္တသဘောကို သူ့သဘောအတိုင်း မြင်အောင် ကြည့်တဲ့အလုပ်ပဲ။ တစ်လုံးတည်းပြောရရင် သန္ဒိဋ္ဌိကော (ခံစားမှုသဘော၊သိမှုသဘောတွေ စသည့်ခန္ဓာပေါ်ပြီး ပျက်သွားတာကို ကိုယ်တိုင်မြင်တာ)။ အများနားလည်အောင်ပြောရရင် ဝိပဿနာအလုပ်တရား။ ဝိပဿနာအလုပ်တရားဆိုတာသည် အဝိဇ္ဇာ-တဏှာကင်းပြီး ပြုတ်အောင် ကျင့်တဲ့တရားဖြစ်တယ်။
ဒီအဝိဇ္ဇာ-တဏှာကို လေးမဂ်၊လေးဖိုလ်ဉာဏ်နှင့် အရှင်းဖြုတ်လို့ ပြုတ်ရင် စုတိစိတ်ပြီး ပဋ္ဋိသန္ဓေစိတ်မပေါ်ဘူး။
မပေါ်ရင် အဇာတိ လို့ခေါ်တယ်။ အဇာတိကို နိဗ္ဗာန်လို့ခေါ်တယ်။
ဒီလို နိဗ္ဗာန်ရောက်ကြောင်းတရားကို ဗုဒ္ဓတရားဟု ခေါ်သည်။
ဗုဒ္ဓဘုရားသည် ခုနှစ်နှစ်သား ရဟန်ကိုလည်း ဉာဏ်ပါရမီပြည့်ရင် သစ္စာတရားဟောပြီး နိဗ္ဗာန်ရောက်ကြောင်း အကျင့်ကို အားထုတ်စေပြီး ခုနှစ်နှစ်သား ရဟန်းက ရဟန္တာဖြစ်တယ်။
တို့မှာ ဉာဏ်ပါရမီပြည့်မပြည့်တော့မသိပါဘူး- ဗုဒ္ဓတရားကို နှလုံးသွင်းနိုင်တဲ့ ဉာဏ်အမြင်မရှိရင်တော့ ဉာဏ်ပါရမီမပြည့်တာအမှန်။

ဒါကို ကြိုးစားပြီးနှလုံးသွင်းဖို့ ဝီရိယစိုက်ပြီး အားထုတ်ကြည့်ဖို့မရှိဘဲ အဝိဇ္ဇာ-တဏှာတရားဘက်ကူးပြီးတော့-ဒီလိုအတွေးဝင်လာတတ်တယ်… ဖြစ်လာမှာပါလေ၊ နတ်ပြည်တော့ ရောက်မှာပေါ့ဆိုလို့ကတော့ အဝိဇ္ဇာ-တဏှာတရားက ဗုဒ္ဓတရားကိုလွှမ်းမိုးသွားတာပဲ။
ပွင့်ပွင့်လင်းလင်းပြောရရင်တော့ အဝိဇ္ဇာ-တဏှာတရားက ပိုပြီး စွမ်းအားထက်တယ်။ ပိုပြီး လွှမ်းမိုးတယ်။ လူတိုင်းလက်ခံလွယ်တယ်။ ကျင့်ကြံလွယ်တယ်။ ( ဉာဏ်အားနည်းသူတို့အတွက် )

အဲဗျာ.. လိုရင်းကို နားလည်မှ လိုရင်းကို ဆိုက်ဆိုက်မြိုက်မြိုက်ရောက်မှာဖြစ်တယ်။

လိုရင်းကို နားမလည်ဘဲ လိုရာဆွဲရင်တော့ သာသနာပတရားဖြစ်တဲ့ အဝိဇ္ဇာ-တဏှာတရားရဲ့ လမ်းညွှန်ချက်နှင့်အညီ လိုရာ ဇာတိဒုက္ခပေါ်၍ ခန္ဓာဝန်ထမ်းပြီး အသေစခန်းဖွင့်ကြဖို့ပဲလေနော... 

ဒီစာကို ဖတ်ရင်နဲ့ပဲ အဝိဇ္ဇာ-တဏှာတရားက ဝင်ဝင်လာလိမ့်မယ်။
( ဒီလို…..တို့ ကပုထုဇဉ်ပဲလေ … ပါရမီမှ မပြည့်သေးတာ…လုပ်စရာတွေက ကျန်သေးတယ်၊ သားရေး၊သမီးရေးကိစ္စတွေက မပြီးပြတ်သေးဘူး….နောက်ဘဝမှ လုပ်တော့မယ်…..ဒါနလုပ်အုံး၊ သီလပဲ မြဲအောင်ဆောက်ကြည့်ပါအုံး..မလွယ်ဘူးနော်….စသည်ဖြင့်လာမယ်)
အဲ…ဒီလို ရိုးရိုးတန်းလက်မှတ် ဝယ်နေရင် ဘယ်တော့မှ အထက်တန်းက လိုက်ရမှာမဟုတ်ဘူး။
ရိုးရိုးတန်းက လိုက်နေရင်းနဲ့ပဲ ရထားမှောက်သေကြရလိမ့်မယ်။

အားလုံးမိမိဖြစ်စဉ်သဘာဝကို မသေခင်မှာ အမှန်မြင်ဖို့ ကြိုးစားရင်း ကိုယ်စိတ် နှစ်ဖြာ ကျန်းမာအေးမြကြပါစေ..

            မြတ်စွာဘုရားရှင်နှင့်တကွ အရိယာပုဂ္ဂိုလ်တို့၏ နှလုံးသားမှာ ဇာတိသံသရာဝဋ်ဆင်းရဲမှ လွတ်မြောက်လိုမှု အလံကလေးကို စိုက်ထူပြီး တလူလူလွင့်လို့နေကြပါတယ်… မြင့်မြတ်သော ပုဂ္ဂိုလ်မြတ်တို့၏ နှလုံးသားကဲ့သို့ ဓမ္မမိတ်ဆွေတို့၏ နှလုံးသားမှာလည်း အဲဒီအလံကို စိုက်ထူပြီး တလူလူလွင့်နေပြီဆိုရင် မြင့်မြတ်သော နှလုံးသားပိုင်ရှင်များ ဖြစ်သွားပြီလို့ ကျွန်တော်က ဖော်ညွှန်းပြောဆိုတာလား- သူ့သဘောက ဒီသဘောဖြစ်သွားသလား….

လေးစားစွာဖြင့်

ဝင်းမြင့်

(၁၆-၀၆-၂၀၀၈)